Чатырына учак коно алат. Жалал-Абадда 7 кабаттуу оорукана курулат
Жалал-Абад облустук ооруканасына 7 кабаттуу имарат курулат. Бул тууралуу бүгүн, 31-мартта министрлер кабинетинин төрагасынын орун басары – УКМК төрагасы Камчыбек Ташиев билдирди.
Президенттин аймактагы өкүлчүлүгүнөн билдиришкендей, жаңы имарат толугу менен заманбап шартта салынып, анын чатырына тик учак конуусу үчүн атайын аянтчасы камсыздалат.
Камчыбек Ташиев облустук оорукананын аймагындагы эскилиги жеткен имараттарды бузуу тапшырмасын коюп, жеке менчик клиникаларды, өз алдынча куруп алган турак-үйлөрун дагы оорукана аймагынан чыгаруу тапшырмасын койду.
Оорукана тийиштүү медициналык-техникалык каражаттар менен камсыз кылынат жана аймагында бейтаптар үчун жашыл аймактарды курууга басым жасалат.
Курулуш иштери ушул жылы башталат. Ага жалпы 900 млн. сомдун тегерегинде каражат жумшалаары айтылды. Камчыбек Ташиев өлкө бшачысы Садыр Жапаровдун тапшырмасы менен бул каражат камсыз кылынаарын белгиледи.
Аталган оорукана облустук болгондуктан Жалал-Абад облусунун бардык райондорунан келип даарылангандар көп. Мындан улам бейтаптар үчүн орундар жана медициналык персоналдын жетишсиздиги көйгөй жаратып келет.
