Бишкек, Кыргызстан – Ж. Баласагын атындагы Кыргыз улуттук университетинин (КУУ) 100 жылдык мааракесине карата "Сабакты кызыктуу өтүү: Инновациялык ыкмалар жана мыкты тажрыйбалар" аттуу педагогикалык конференциясы ийгиликтүү жыйынтыкталды. Иш-чара "Мугалимдик чеберчилик: 100 жылдыкка 100 ыкма" методикалык челленджинин алкагында уюштурулуп, педагогикалык колледждин жетекчилиги, окутуучулар, студент-практиканттар, мектеп мугалимдери жана ата-энелер катышты.

Конференциянын негизги максаттары:

• Сабакты кызыктуу өткөрүүнүн инновациялык ыкмаларын жайылтуу.
• Колледж – студент – мектеп – ата-эне ортосундагы кызматташтыкты чыңдоо.
• Китеп окуу маданиятын жайылтуу.

Конференциянын жүрүшү:

Иш-чара көргөзмө-жарманке менен башталып, студент-практиканттар өздөрүнүн методикалык материалдарын тааныштырды. Андан соң 10 жуп мастер-класс өтүп, мугалимдер жана студенттер сабак өтүүнүн жаңы ыкмаларын практика жүзүндө көрсөтүштү. "Китеп окуу маданияты – түшүнүү жана талкуу аркылуу өнүгүү" темасында кызыктуу талкуу болуп, "Сингапур билим берүү системасы: парадокстардын күчү" китеби боюнча пикир алмашуу жүргүзүлдү. Суроо-жооп сессиясында катышуучулар билим берүүдөгү жаңы технологиялар, студенттердин практикалык даярдыгы жана AI-жасалма интеллекти колдонуу тууралуу ой бөлүшүштү.

Конференция катышуучулар үчүн пайдалуу жана жемиштүү өтүп, сабак өтүүнүн заманбап методикалары боюнча тажрыйба алмашууга чоң мүмкүнчүлүк түздү. Уюштуруучулар мындай иш-чараларды жыл сайын өткөрүү демилгесин колдоого алышты.

Катышуучулардын пикири:

• Педагогикалык колледждин башчысы Шарабидинов М.Т. иш-чара студенттердин келечектеги кесиптик өсүшүнө чоң мотивация бергенин белгиледи.
• Практика методисти Нуруева Ж.Б. конференция колледж, мектеп жана ата-энелердин биргелешип иш алып баруусунун мыкты үлгүсү болгонун айтты.
• №69 мектептин башталгыч класстарынын мугалимдери мастер-класстар абдан пайдалуу болгонун белгилешти.
• Ата-энелер мындай иш-чаралар билим берүү мекемелери менен тыгыз байланышта болушуна жардам бере турганын белгилешти.
• Студент-практиканттар иш-чарадан көп нерсеге үйрөнүп, келечекте өз кесибине ишеними артканын билдиришти.

Конференциянын уюштуруучулары жана катышуучулары билим берүү тармагындагы инновациялык ыкмаларды жайылтууга жана кызматташтыкты чыңдоого багытталган бул иш-чаранын ийгиликтүү өткөнүн белгилешти.