Кыргызстанда алты айда 240 сел катталып, эки адам каза болду
Кыргызстанда 2026-жылдын алгачкы жарым жылында 240 сел кырсыгы катталып, анын кесепетинен эки адам каза болду. Бул тууралуу өзгөчө кырдаалдар министринин орун басары Акылбек Мазарипов билдирди.
Анын айтымында, учурда Баткен, Жалал-Абад, Ош жана Талас облустары селден олуттуу жабыркап, табигый кырсыктар аймактардын инфраструктурасына жана экономикасына зыян келтирүүдө.
Эске салсак, 5-июнда Балыкчы—Ананьево—Каракол унаа жолунун 92-чакырымында сел аралаш баткак унааларды басып калып, эки адамдын өмүрү кыйылган.
Ал эми 22-июнда Баткен районундагы бир катар айылдарды сел каптап, аймакта өзгөчө кырдаал режими киргизилген. Президент Садыр Жапаров селдин кесепеттерин жоюу иштерин жеке көзөмөлүнө алган.
