"Алтын Казык" - келечекке жол: КУУ ректору ОшТУну кызматташууга чакырды
Кыргыз улуттук университетинин (КУУ) ректору, профессор Д.Т. Чонтоев баштаган делегация М. Адышев атындагы Ош технологиялык университетине (ОшТУ) иш сапары менен барды. Сапар алгач окуу жайдын профессордук-окутуучулук курамы менен жолугушуудан башталып, меймандар заманбап аудиториялар жана университеттин жетишкендиктери менен таанышышты.
ОшТУнун ректору Ж.Ж. Турсунбаев өз сөзүндө КУУнун 100 жылдык мааракеси менен куттуктап, окуу жайдын сыймыктуу профессорлору менен илимпоздорунун көпчүлүгү КУУнун бүтүрүүчүлөрү экенин баса белгиледи. Бул факты КУУнун өлкө тарыхындагы жана тагдырындагы ордун, миссиясын жана басып өткөн жолун айкын көрсөтүп турганын айтты. Ошондой эле, ОшТУ теория менен практиканы айкалыштырып, түштүк аймактын гана эмес, бүткүл республиканын ички өндүрүшү үчүн заманбап талаптарга жооп берген адистерди даярдап жаткандыгын билдирди.
Өз кезегинде КУУнун ректору, профессор Д.Т. Чонтоев университеттин бүгүнкү күндөгү ийгиликтери менен бөлүшүп, "Алтын Казык" программасынын маанисине токтолду. Ал кесиптештерин мамлекет башчысы С. Жапаровдун доктринасынын алкагында биргелешип активдүү иш алып барууга чакырды.
Жолугушуунун жыйынтыгында Ж.Баласагын атындагы КУУ менен ОшТУнун ректорлору кызматташуу меморандумуна кол коюшту. Бул документ эки окуу жайдын ортосундагы илимий жана билим берүүнүн бардык багыттары боюнча тыгыз кызматташтыкка даяр экендиктерин билдирет.
Автор: Ширин Костюк, Журналистика жана коммуникация институтунун директору.
