КУУнун ректору Д.Т. Чонтоев баштаган делегация ОшМУга иш сапары менен барды
Ж.Баласагын атындагы Кыргыз улуттук университетинин ректору, профессор Д.Т. Чонтоев баштаган делегация Ош мамлекеттик университетине расмий иш сапары менен барып, эки жогорку окуу жайдын ортосундагы кызматташтыкты талкуулады.
Иш сапар "Келечек муундар хабы" менен таанышуудан башталды. Делегация заманбап билим берүү борборлорунун иши, жаңы долбоорлордун ишке ашырылышы менен кызыгып таанышты. Андан соң КУУнун делегациясы ОшМУнун башкы имаратында профессордук-окутуучулук курам менен жолугушту.
Жолугушууда ректор Д.Т. Чонтоев ОшМУда болуп жаткан ийгиликтүү иш-чараларга токтолуп, КУУнун 100 жылдык мааракесине карата расмий чакырууну тапшырды. Ал өз сөзүндө кылымдык тарыхы бар КУУ 190 миңден ашуун бүтүрүүчүлөрдү өлкөнүн ар кыл тармактарына даярдап чыгаргандыгын баса белгиледи.
Ректор ошондой эле Кыргызстандагы билим берүү системасындагы, айрыкча 12 жылдык билим берүүгө өтүү процессиндеги трансформациянын маанисине токтолуп, жогорку окуу жайлардын ролун, "Алтын Казык" программасынын алкагында билим берүүнү 2026-жылга чейин өзгөртүүнүн негизги багыттарын аныктоо, жогорку кесиптик билим берүү системасын өнүктүрүүнүн келечегин белгилөө жана өлкө университеттеринин ортосундагы кызматташтыкты чыңдоо зарылдыгын айтты.
Иш-чаранын алкагында квалификацияны жогорулатуу боюнча күбөлүктөрдү тапшыруу аземи болуп өттү. КУУнун мамлекеттик жана муниципалдык ишмердүүлүктү ченемдик укуктук камсыздоо программасынын негизинде ОшМУнун профессордук-окутуучулар курамы үчүн "Эл аралык укук" темасында 144 сааттык онлайн квалификация жогорулатуу курстары ийгиликтүү аяктагандыгы белгиленди. Бул эки университеттин ортосундагы жемиштүү кызматташтыктын далили болуп саналат.
