Кыргыз Республикасынын Улуттук коопсуздук боюнча мамлекеттик комитети (УКМК) мамлекеттик мүлктү мыйзамсыз түрдө менчиктештирүү фактыларын аныктоо боюнча жүргүзүлүп жаткан иш-чаралардын алкагында Саламаттык сактоо министрлигине караштуу Улуттук онкология жана гематология борборуна тиешелүү 0,46 гектар жер тилкесинин мыйзамсыз ээленип алынгандыгын аныктады.

Тергөөгө чейинки текшерүүнүн жүрүшүндө Улуттук онкология жана гематология борборунун директорунун мурдагы орун басары К.О.И. өзүнүн кызматтык абалынан кыянаттык менен пайдаланып, жеке кызыкчылыгын көздөп, борбордун түштүк-батыш тарабында жайгашкан аталган жер тилкесин мыйзамсыз түрдө ээлеп алгандыгы такталды.

Маалыматка ылайык, 1997-жылы К.О.И. борбордун жетекчилигинде турганда, 60 унаага ылайыкталган убактылуу гараждарды куруу шылтоосу менен аталган жер тилкесин ижарага алуу боюнча келишим түзгөн. Андан соң, эч кандай укук белгилөөчү документтери жана курулушка уруксаты жок туруп, ал жерге бир нече турак үй куруп алган. Анын биринде 28 жылдан бери өзү жашап келген жана мыйзамсыз басып алуу фактысын жашыруу максатында кыймылсыз мүлккө эч кандай каттоо жүргүзгөн эмес.

Текшерүүнүн жыйынтыгында аныкталгандай, бул жер тилкеси Бишкек шаардык мэриясынын же Улуттук онкология жана гематология борборунун балансында жок болуп чыкты. Ошондой эле, кадастр органдары тарабынан дагы 28 жыл аралыгында бул жер участогуна идентификациялык код ыйгарылган эмес.

Белгилей кетүүчү жагдай, мыйзамсыз курулган объектилердин катарында өзүнчө операциялык блок жана бильярд залы да бар. Медициналык мекеменин оор абалда жаткан бейтаптар үчүн орун жетишсиздигин эске алганда, кайтарылган жер тилкесине кошумча палаталарды курууга толук мүмкүнчүлүк бар.

УКМК тарабынан көрүлгөн чаралардын натыйжасында К.О.И. менен Улуттук онкология жана гематология борборунун ортосундагы ижара келишими жокко чыгарылды. Учурда 0,46 гектар жер тилкесине идентификациялык код ыйгаруу жана аны мамлекеттин балансына өткөрүп берүү боюнча тиешелүү иш-чаралар жүргүзүлүүдө.